អគ្គបញ្ជាការដ្ឋានកងទ័ព ធ្វើសន្និសីទសារព័ត៌មានទាក់ទងនឹង សមយុទ្ធយោធានាគមាស

អគ្គបញ្ជាការដ្ឋានកងទ័ព ធ្វើសន្និសីទសារព័ត៌មានទាក់ទងនឹង សមយុទ្ធយោធានាគមាសរវាងកងទ័ពកម្ពុជា-ចិន លើទឹកដីកម្ពុជា

(ភ្នំពេញ)៖ ឧត្តមសេនីយ៍ទោ ថោង សូលីម៉ូ អ្នកនាំពាក្យអគ្គបញ្ជាការដ្ឋាននៃកងយោធពលខេមរភូមិន្ទ នៅរសៀលថ្ងៃទី១៣ ខែឧសភា ឆ្នាំ២០២៤នេះ បានរៀបចំធ្វើសន្និសីទសារព័ត៌មានទាក់ទងនឹងការធ្វើលំហាត់សមយុទ្ធនាគមាស ឆ្នាំ២០២៤ ជាសមយុទ្ធទ្រង់ទ្រាយធំលើកទី៦ រវាងកងយោធពលខេមរភូមិន្ទ ជាមួយកងទ័ពរំដោះប្រជាជនចិន។

សម្រាប់លំហាត់សមយុទ្ធយោធារវាងកងទ័ពកម្ពុជា និងចិននេះ នឹងធ្វើឡើងក្រោមវិធានបទ «ប្រតិបត្តិការប្រឆាំងអំពើភេរវកម្មរួម និងការសង្រ្គោះមនុស្សធម៌» ចាប់ពីថ្ងៃទី១៦ ដល់ថ្ងៃទី៣០ ខែឧសភា ឆ្នាំ២០២៤ នៅភ្នំជុំសែនរីករាយ ខេត្តកំពង់ឆ្នាំង និងខេត្តព្រះសីហនុ។

លំហាត់សមយុទ្ធនាគមាស រវាងកងយោធពលខេមរភូមិន្ទ ជាមួយកងទ័ពរំដោះប្រជាជនចិន បានរៀបចំឡើងរួចនៅក្នុងលើទឹកដីប្រទេសកម្ពុជា ចំនួន៥លើក មកហើយ ចាប់តាំងពីឆ្នាំ២០១៦មក ប៉ុន្តែសមយុទ្ធនេះ បានអាកខានទៅវិញ បន្ទាប់ពីផ្ទុះឡើងនូវការរាតត្បាតជំងឺកូវីដ១៩។ បន្ទាប់មក «សមយុទ្ធនាគមាស ២០២០» ដែលជាសមយុទ្ធយោធារួមគ្នាលើកទី៤ ត្រូវបានរៀបចំឡើង នៅឯទីលានបាញ់គ្រាប់ពិតតេជោសែនជុំគីរី ស្ថិតក្នុងភូមិអូរ ឃុំត្រពាំងរាំង ស្រុកជុំគិរី ខេត្តកំពត ក្រោមប្រធានបទ៖ «រួមគ្នាប្រឆាំងភារវកម្ម នឹងការងារមនុស្សធ៌ម» ដែលពេលនោះកម្ពុជា មិនទាន់មានករណីឆ្លងជំងឺកូវីដ១៩ ក្នុងសហគមន៍នៅឡើយ។

ដោយឡែកសម្រាប់ឆ្នាំ២០២៣ កងទ័ពទាំងពីរមានធ្វើលំហាត់សមយុទ្ធរួមគ្នាចំនួន៤លើកផងដែរ រួមមានទី១៖ លំហាត់សមយុទ្ធនាគមាស លើកទី៤, ទី២៖ លំហាត់សមយុទ្ធទេវតាសន្តិភាព, លំហាត់សមយុទ្ធមាតុភូមិដ៏បវរ ដែលធ្វើឡើងលើទឹកកម្ពុជា និងទី៤៖ លំហាត់សមយុទ្ធសន្តិភាព-មិត្តភាព លំហាត់នេះបានធ្វើឡើងលើទឹកដីប្រទេសចិន។

កម្ពុជា-ចិន បានបង្កើតទំនាក់ទំនងរយៈពេល៦៦ឆ្នាំមកហើយ។ ភាគីទាំងពីរបានដំឡើងកម្រិតទំនាក់ទំនងជាបន្តបន្ទាប់ រហូតក្លាយជាដៃគូយុទ្ធសាស្រ្តគ្រប់ជ្រុងជ្រោយ និងកំពុងរួមគ្នាកសាងសហគមន៍រួមវាសនាតែមួយ៕