တော်လှန်ရေးကာလ ဦးဆောင်မှု NUG ပေးနိုင်သလား - ၃ နှစ်ပြည့် NUG အပေါ် ဆန်းစစ်ခြင်း - BBC News မြန်မာ

အမျိုးသားညီညွတ်ရေးအစိုးရ NUG ဖွဲ့ခဲ့တာ ၃ နှစ် ရှိလာခဲ့ပြီ ဖြစ်ပါတယ်။ ၃ နှစ်တာကာလ ဖြတ်သန်းခဲ့တဲ့ အားသာချက်၊ အားနည်းချက်တွေကို ပြန်လည် သုံးသပ်မယ်၊ သင်ခန်းစာတွေယူမယ်၊ တော်လှန်ရေးကို အောင်ပွဲနဲ့ အတူ အဆုံးသတ်နိုင်ဖို့ တခြားတော်လှန်ရေး အင်အားစုတွေနဲ့ အတူ ဆက်ပြီး ကြိုးစားမယ် ဆိုပြီး NUG က ထုတ်ပြန်ပါတယ်။

ဒီတော့ .... လက်ရှိ စစ်ရေး မျက်နှာစာမှာ ဖြစ်စေ၊ အနာဂတ် ပြည်ထောင်စုနိုင်ငံကို ဘယ်လိုဘယ်ပုံ ထုဆစ် ပုံဖော်ကြမလဲ ဆိုတာတွေ အပေါ်မှာ ဖြစ်စေ စစ်အာဏာသိမ်းမှု ဆန့်ကျင်ရေး အင်အားစု အသီးသီး အပါအဝင် တိုင်းရင်းသား အဖွဲ့တွေနဲ့ကြားမှာ ဘုံသဘောထားနဲ့ နည်းနာလမ်းစဥ်တွေ တိတိကျကျ ရှိလာအောင် NUG အနေနဲ့ ဘယ်လောက် အတိုင်းအတာထိ ချိတ်ဆက်ထားနိုင်ပါပြီလဲ ... ။

တခါ ... NUG ကိုယ်၌မှာရော ဘယ်လိုဘယ်ပုံ ပြုပြင် ပြောင်းလဲတာတွေ လုပ်ဖို့ လိုလဲ ... အစိုးရအဖွဲ့တွင်း ပြောင်းလဲပြင်ဆင်တာမျိုးတွေ တွေ့လာရဖွယ် ရှိလား .... စစ်ရေးအရ ထိန်းချုပ်မြေ၊ လွတ်မြောက်မြေတွေဟာ နိုင်ငံရဲ့ ထက်ဝက်မက ဖော်ဆောင်နိုင်ခဲ့ပြီ ဆိုရင် အဲဒီ အခြေအနေနဲ့ လိုက်ဖက်တဲ့ NUG ရဲ့ အစိုးရ ယန္တရား လည်ပတ် လှုပ်ရှားတာမျိုးတွေကို မြေပြင်မှာ ဘယ်လောက် အတိုင်းအတာထိ မြင်လာရမလဲ စတာတွေကို ဒီတစ်ပတ် သတင်းမြင်ကွင်း အစီအစဥ်မှာ အာရုံစိုက် ဆွေးနွေးသွားမှာ ဖြစ်ပါတယ်။

ဒီတစ်ပတ် ပါဝင် ဆွေးနွေးကြသူတွေကတော့ လူ့အခွင့်အရေးဆိုင်ရာ စောင့်ကြည့်ရေး နိုင်ငံတကာ အဖွဲ့ HRW နဲ့ အာရှ ဖောင်ဒေးရှင်းတို့မှာ အဆင့်မြင့် တာဝန်တွေကို နှစ်ပေါင်းများစွာ ယူခဲ့တဲ့ မြန်မာ့အရေး ကျွမ်းကျင်သူ ဒေးဗစ်မက်သီဆန်နဲ့ အမျိုးသားညီညွတ်ရေး အစိုးရ NUG သမ္မတရုံးရဲ့ ပြောခွင့်ရ ဦးကျော်ဇောတို့ ဖြစ်ပါတယ်။

ဘီဘီစီ သတင်းထောက် ကိုဝေဖြိုး စီစဥ်တင်ဆက်ထားပါတယ်။ #ဘီဘီစီမြန်မာပိုင်း #သတင်းမြင်ကွင်း